Файдалы киңәшләр

Төсе матурлык өченме?

Савыт-саба юа торган губкаларның төрле төстә булуына игътибар иткәнегез бардыр. Бу — матурлык өчен генә түгел.
Поролонга киезгә охшаган тыгыз материал ябыштырыла, ул “скотч-брайт” дип атала. Аны автосервиста машина кузовын буяр алдыннан шомарту өчен кулланалар. Ул савыт-саба юганда, эшне җиңеләйтә.
Губка алганда скотч-брайтның төсен карагыз. Сыйфатлы губкалар җыелмасында төрле төстәгесен куялар. Һәркайсының үз бурычы.
Яшел төстәге скотч-брайт иң тыгызы һәм тупас абразивлы материал. Аны чуен табалар, тырналу куркынычы булмаган савыт-сабаны юу өчен тотарга мөмкин.
Көрән төстәгесе яшеленнән йомшаграк, шулай да шактый тыгыз. Аннан соң зәңгәр, кызыл, кызгылт сары һәм сары төстәгеләр бара, аларда савытны тырнарлык абразивлар юк. Болар көндәлек савыт-сабаны юу өчен яхшы.
Сары — иң йомшак материал, ул бокал, пыяла, бәллүр савытларны юарга ярый.

Нинди йомырка файдалырак?

Күп кеше көрән кабыклы йомырка файдалырак дип уйлый. Чынлыкта аның кабыгы нинди булу мөһим түгел. Ул көрән, ак, хәтта зәңгәрсу, яшькелт тә булырга мөмкин. Аларны төрле токымлы тавыклар сала, аерма шунда гына.
Йомырканың файдалы үзлекләре, туклыклылыгы тавыкны ничек ашатудан тора. Ак кабыклы йомырка тизрәк ватыла, көрәненең кабыгы ныграк, диләр. Монда да бәхәсләшергә мөмкин. Йомырка кабыгы йомшак булу — тавыкка кальций җитмәү билгесе.

Җайланма

Әлеге ролик пирогның өстен бик тиз челтәрләп бизәү мөмкинлеге бирә. Пирогның өсте өчен җәем әзерләргә һәм роликны йөртеп кискәләргә. Ул джемлы эчлекле пироглар өчен бик яхшы булачак.

Гөл төбенә нәрсә әйбәт?

Миләүшә чәчәк (фиалка) В12 витамины ярата. Аны 1 л суга 1 ампула кушып сибәргә кирәк.
Тукландыру һәм профилактика чарасы буларак, бүлмә гөлләренә көл сибәләр. 1 аш кашыгы көлгә 1 л кайнар су коеп, бер атна төнәтегез. Ике атнага бер тапкыр сибәләр.
Алоэ согы гөлләрне үстерә. 1,5 л суга 1 чәй кашыгы кушарга кирәк.
Цитруслылар кабыгын ташламагыз. Өстенә су салып, бер тәүлек төнәткәннән соң аны гөлгә сибәргә була.
Баллы суны барлык гөлләр, бигрәк тә кактус ярата. Ярты стакан суга ярты чәй кашыгы кушып сибәләр.
Табын янында чәйне эчеп бетермичә, раковинага илтеп түгәргә ашыкмагыз. Гөлләр чәй эчәргә ярата. Бигрәк тә аны абага гөле үз итә.
Гөлләрне аспирин белән ашлау да файдалы: 1 л суга 1 төймә дару алына.

Пастеризацияләнгән сөт файдалымы?

Билгеле, иң файдалысы — яңа савылган авыл сөте. Мондый мөмкинлегегез юк икән, пастеризацияләнгәнен алыгыз, ул файдалырак. Бу очракта сөт 76-78 °Ска кадәр җылытыла һәм кинәт суытыла.
Стерилизацияләү өчен сөтне 20-30 минут 120-150 °Ска кадәр җылыталар, ягъни кайнаталар. Анда зарарлы бактерияләр генә түгел, файдалы-лары да калмый. Стерилизациялән-гән сөт бер елга кадәр саклана, пас-теризацияләнгәнен 2 атнадан артык тотып булмый. Сөтнең ничек эшкәртелүен саклану вакытына карап та белә аласыз.
Авыл сөтен өйдә дә пастеризацияләп була. Моның өчен сөтне 72-75 °Ска кадәр җылыталар, 30 секунд шулай тоталар һәм салкын сулы тазга утыртып, 22-38 °Ска кадәр суыталар. Күп мультиваркада “пастеризация” режимы бар. Ул эшне җиңеләйтә — сезгә казанына сөтне салып, тиешле режимны сайлыйсы гына кала.

Туңдырылган лимон

Берничә лимонны юарга, йогышсызландыру өчен бер минутка алма серкәсенә салып алырга һәм төнгә туңдыргычка куярга.
Иртән лимонны кабыгы белән угычтан уарга. Массаны боз савытына бүлеп, кабат туңдыргычка куярга. Лимонлы шакмаклар чәйгә салу өчен яхшы, аны болаи ашарга да була. Ул салкын тигәннән файдалы, шикәр, холестеринны киметә.

Төрле киңәшләр

• Колбаса, сырны фольгага төреп, суыткычка куйсагыз, яхшырак сакланачак.
• Хөрмә катырак булса, банан белән бер пакетка салып торыгыз. Ул болай тизрәк өлгерә, тәмләнә.
• Яшел тәмләткечләрне дымлы тастымалга төреп, суыткычка куйсагыз, озаграк шиңми торырлар.
• Карт тавык тизрәк пешсен өчен, 20-30 минут шулпада кайнаткач, 5-6 минут салкын суга салып алырга кирәк.